Karfullthiami

Pulpit chum thum dum dum a "unau te u" tia thlasik maupuah ve phawng phawng chang te tawng ve tawh mah ila, an tunlai tawng thar NAWI an tih anga hun kan hman ve thinlai te leh World Cup a lo thleng ve leh ta hlawl te hian min nui tir leh huk thin avangin insawitheihna pawh nilovin kan thlasik maupuah pui ve leh phung phung teh ang. Tu pawi mah kan hawl em lovang chu. 

 Hman ah chuan...kha mi kum World Cup ah khan Inkhel en ve tur chuan an khelh hma darkar khat ah kan enna tur kha thlen hman a ngai a... Chhuat a thutna awm zawng zawng leh thutthleng awm zawng zawng, a din theihna zawng zawng kan khat vek thin. Boruak hi a lum thang hulh hulh a ni ber mai. Kha ti taka seat kha a full chung khan ka tana seat min lo hausak ngar ngar tu, tleirawl pahnih, ka bula thut loh hlau ltk mai an awm a. Ka thlen hma in ka tan seat hauh in an lo kar full thin a ni ngei ang. Thutpui ve ve kha thil awl ai tak a nih loh avangin an lo in ti thiam lo thin a nih chu. 

Zankhat chu a upa zawk, kar full rei tawh zawk nia ka rin ah chuan ka thianpa nen thut hmun kan rem leh ta a. Kan karfullthiami chu lai tat in kan leng tawk chiah in a lo kar full a niang.. Chuti taka ka bula thut chak chu tiin ka kut chu ka awm mai mai tir duh ta bik law.. A kut chu a chang leh ka hmet a, a chang leh nuam a tih tawk vela na in ka sik a. Ka hmet sik a ni ber mai. Match an tan tawh a. Kei pawhin Khawvel Inkhel ropui en chungin game phakar tak ka khel ve mek a ni. Minute 45 a liam ta. Karfullthiami chu zung turin a chhuak a.. Enga ti nge? Engvangin nge? Ka kut chuan tleirawl kut a la hmetsik reng tho si. Kan tleirawl thutpui lah a zung daih kha a ni a. Awi ka rei ka chesual ta.. A tir atang khan minute 45 chhung teh meuh ka thianpa kut chu ka lo hmet sik a nih chu..!! Ka thianpa a nui dir char char a, kei lah chu ti bawk. Kha thil hretu kha 2 lek kan ni na a, kan nuih nasat ltk avangin inchhung kan va al hneh chiang em. Kha thil kha World Cup a lo thlen hian ka hrechhuak a, ka note ti pungtu a lo ni ta...