Ka in chhir lo

HNA IN MIN ZAWNG: Kum 2004 ah ka Graduate ve a. Hna te ka zawng tawh mai dawn em ni? ka NCC certificate neih that leh camp ka attend tawhna a Merit Certificate ka dawn te leh Gold Medal te, Best Discipline Award ka dawn te kha min ti chak tu atana hman ka tum mek laiin ngai teh, Tarmit bun, sam tuak pheuh pheuh a lo leng a. Eng school head emaw ni chu a lo ni a. Kha ni, May ni 15,2004 khan an khua ah zirna a chhiat em em thu leh class -4 pass te pawh in mahni hming tak ngial pawh ziak thei lo an awm thu min hrilh ta mai a. Min va barakhaih em. Chu Khua a an VCP chuan, zirna siamtha turin hma ka lak phawt chuan puih min huam thu a sawi ta mai bawk kha a nia. 

SCHOOL KAN DIN TA MAI: An VCP chuan School hmun tur ram min pe fel nghal a.. Vc Secretary chuan "school chu Mizo medium ni rawhse" a tih mek laiin midang zawng in English Medium an duh avang in chu chu kan tum ru ta. Mahse, khawtlang in a duh tak zet em? Eng hna duhawm tak emaw kan hma ah rawn zuar pawh nise, kan uipui tui lian thlir mai tawh dawn tih leh kan lu kan phumna hmun tawh tur a ni tih kan hriat avangin chu khua in tinah lengin an ngaihdan kan zawt a. A va phurawm em.. A then chu mittui parawl lek lek in, Pathian ruat kan nih ngei thu te min fah ta hial a. Tichuan kum 2005 ah vcp chuan school thar a hawng ta rup mai le. School building tur an han thawh khawm mai tak tak a. Kum 2 hnu ah building tha tak kan nei ta. 

HLAWH A TLEM SI, ENGTIN ZEL NGE: IV grade hlawh pawh pha lo han nih ngawt chu tia mi thenkhat in min fuih rukna leh hna min zawrh ruk ve ni te khan Zam ngailo val kha ka zam ve tep chu a nih kha. Ni e. Kan naupang te lah chu an khing em em mai a. Luna leh luakchhuak, aw chhang burin kan au va. Inrinni ah nen lam kan han kalpui chang a awm. 

KA IN CHHIR LO: Kum a lo vei tam ve ta. Kan naupang chhuak te, HSLC ah, maths, Mizo, English ah te letter hmu a division tha tak tak an han nei ta hi, Pathian hruaina ropui tak hnuai a kan tawn ropui tak a ni. Hei hi ka hlawh chu a ni ta. Hlawh ka la ve ta a nih chu. Lalpa, i remruatna kawnga kal hi hling bawn hlang pawh nise, ka in chhir ngai lovang.